• Како да изберам извршител?

Извршителите се именувани и распоредени на 11 подрачја на основните судови во Република Македонија.  Надлежноста на извршителот е да извршува извршни одлуки  донесени од страна на судовите,  државните органи, односно нотарите чие седиште е на подрачјето за коешто е именуван извршителот. На пример, за пресуда донесена од страна на Основниот суд во Велес се надлежни извршителите именувани за подрачјето на Основен суд Велес, Основен суд Гевгелија, Основен суд Кавадарци и Основен суд Неготино. Сите именувани извршители со нивни контакт податоци се достапни на веб страната на Комората на извршители.

• Кој може да учествува на лицитација кај извршител?

Во јавното наддавање можат да учествуваат само лица кои претходно положиле гаранција. Гаранцијата изнесува една десеттина од утврдената вредност на недвижноста. На понудувачите чија понуда не е прифатена, гаранцијата им се враќа веднаш по заклучувањето на јавното наддавање.

• Дали извршителот има право да спроведува извршување од цела плата односно пензија на должникот?

Извршувањето врз плата и пензија може да се спроведува до износот од една третина на платата или пензијата, а во случаи на побарувања заради издршка, надомест на штета заради загубена издршка поради смрт на давачот на издршката и др., може да се спроведе извршување до една половина од платата или пензијата.Должникот чија сметка е блокирана а на истата таа прима плата односно пензија, неоходно е да писмено да го извести извршителот и да презентира доказ кај извршителот со цел да се одблокира сметката во банка и да се продоложи извршување со остатокот од паричните средства кои не го зафаќаат законскиот минимум од 1/3 односно 1/5.

• Кое долгови можат да се сметаат за застарени ?

Застареноста на побарувањата е уредена со Законот за облигациони односи на Република Македонија  и истата се определува во секој поединечен случај, во зависност од видот на побарувањето. Рокот во кој доверителот може да поднесе барање за присилно извршување изнесува 10 години од денот на правосилноста на одлуката со која се утврдил долгот, а по поднесување на барањето за извршување кај извршител настапува прекин на застарувањето и не течат рокови се додека тече спроведување на извршување. Со преносот на  извршните предмети од судовите кај извршителите, рокот за застареност се прекинува.  Не може да се земе предвид застареноста ако должникот не се повикал на неа.

• Дали како странка имам право на судска заштита во фаза на извршување ?

Странката или учесникот којшто смета дека при извршувањето се сторени неправилности може да поднесе приговор до претседателот на основниот суд на чија територија извршувањето, или пак дел од него, се спроведува во рок од од три дена по денот на осознавање на неправилноста, но не подоцна од 15 дена по завршувањето на извршувањето. За поднесениот приговор и за судската одлука донесена по приговорот, поднесувачот на приговорот е должен да плати судска такса според Законот за судски такси.Таксата за приговорот се плаќа како и таксата за тужба согласно со таксената тарифа според вредноста на оспорениот дел. Трошоците за судските такси и доставата се сметаат како трошоци на извршувањето.

• Дали извршителот има право присилно да го наплаќа долгот од  жирантите?

При спроведување на извршување на една извршна исправа,  обврската спрема доверителот ја исполнуваат оние кои се обврзале на тоа, што значи освен главниот должник обврска за  враќање на долгот имаат и другите потписници на исправата, кои можат да бидат жиранти, гаранти,  менични должници, а најчесто станува збор за солидарна одговорност. Што значи, заедно со главниот должник обврска за враќање на долгот имаат и останатите должници па извршителот има право да го насочи извршувањето и спрема жирантите, гарантите или меничните должници .

• Дали извршителот има право да ги обработува моите лични податоци?

Извршителот како правно лице се јавува како контролор на збирка на лични податоци врз основа на член 2 ст.5 од Законот за лични податоци в.в со член 6 од Законот за лични податоци обработката може да се врши и без согласност од субјектот на лични податоци кога обработката е потребна заради извршување на работи од јавен интерес или службено овластување на Контролорот.  Согласно член 9 од Законот за заштита на личните податоци,  предвидена е можност матичниот број на граѓаниот да може да се обработува при вршење на работи кои се однесуваат на добивање на кредит, наплата на долг …, извршителите ги обработуваат личните податоци наведувајќи ги во актите  кои се изготвуваат врз основа на обрасци по форма утврдена од страна на Министерот за правда, а согласно со прописите за заштита на личните податоци. Извршителот како лице со јавни овластувања има право да врши легитимирање на странките и учесниците со увид во документите за лична идентификација.