Интервју Ванчо Марковски: Граѓаните најмногу должат за комуналии и за брзи кредити, а тие долгови тешко се наплатуваат

Во наредните три години Комората на извршители ќе ја предводи Ванчо Марковски, извршител од Тетово, кој во оваа професија е од 2006 година, односно од самиот почеток на приватното извршување кај нас. Вели дека меѓу другото ќе работи на подигање на рејтингот на професијата, но и на реализација на предлогот на Комората социјалната и другите помоши од државата граѓаните да ги примаат на посебни, наменски сметки, кои нема да можат да се блокираат. Според него не е точно дека по четирите месеци неработење за време на вонредната состојба извршителите ги „нападнале“ должниците, зашто во тој период биле примени малку предмети за извршување. Ланското намалување на извршителската тарифа, пак, е причина неколку извршители да си дадат оставка, а на конкурсите да нема нови кандидати за вршење на таа професија

Неодамна сте избран за претседател на Комората на извршители во наредните три години на местото на Зоран Димов, кому му заврши мандатот. Какви новини планирате да воведете во работењето на Комората и воопшто на извршителите?

-Да, точно е, на 01.10.2020 година на одржаното изборно вонредно собрание на КИРСМ со добивање на апсолутно мнозинство од членовите на Собранието во првиот круг избран сум за претседател на КИРСМ. Прво сакам административно и организациски да ги средиме работите во самата Комора, нормативниот дел, многу поголема медиумска активност со вистински приказ на работите преку аналитички показатели, а не само паушални фрази кои не соодветствуваат на факти. Подигање на јавниот рејтинг на самиот процес на примена на Законот за извршување како неодвојлив дел од правосудниот систем во државата. Добивање на судска пресуда после долг судски процес значи само голо парче на хартија доколку не се реализира петитумот на самата судска одлука. Подигање на интегритетот и дигнитетот на професијата извршител. Подобрување на законските услови за работа на извршителите. Создавање поповолни услови за интерес за работење на оваа професија во иднина. Комората веќе работи на предлог со кој ќе се побара социјалната помош како и слични парични дотации кои се примаат од државата да бидат исплатувани на наменски сметки на граѓаните кои ќе бидат надвор од нивните регуларни трансакциски сметки во банките и истите при евентуална блокада од било кој орган нема да бидат блокирани, односно тие дотации ќе можат слободно да ги користат.

Во вонредната состојба и нешто потоа извршителите практично ништо не работеа цели четири месеци, па се жалеа дека останале без приходи. Вие имате извршителска канцеларија во Тетово. Може ли низ својот пример да кажете како помина тој период?

-Со една реченица – никогаш да не се повтори таквиот период. Во тој период уредбите кои што беа донесени во врска со нашето работење односно неработење го запреа активниот процес на извршување, а се дозволи да се работат дејствија за кои извршителите не можеа да наплатат ниту еден денар. Значи, во тој период извршителите правеа трошоци за плати, кирии, струја, телефони и друго, а приходот им беше нула.

Pages: 1 2 3 4 5 6 7 8 9