Собранието на Република Македонија во месец мај 2005 година го донесе Законот за извршување кој беше објавен во Службен весник на Р. Македонија бр.35/05, од 18.05.2005 година, кој започна со примена на 26.05.2006 година. Со овој реформски закон се воведува приватен систем на извршување на извршните исправи од страна на извршители кои се лица со јавни овластувања именувани од страна на министерот за правда.

Комората на извршители е основана на 7 јуни 2006 година на Основачко Собрание на Комората  на извршители и на истото се избрани органите на Комора предвидени со Законот за извршување. Комората е со својство на правно лице и седиште во Скопје и во неа задолжително се здружуваат извршителите и замениците на извршителите. При основањето бројот на именувани извршители изнесуваше 40, денес, во Комората на извршители членуваат 97 извршители и 6 заменици на извршители кои се распоредени на 11 подрачја на Основните судови во Република Македонија.

Прв претседател на Комората е Горан Тошевски, извршител од Скопје избран на Основачкото Собрание на Комората, потоа, во периодот од 21 септември 2007 година до 10.06.2012 година претседател на Комората беше Антончо Коштанов, во период од 10.06.2012 година до 10.06.2014 година претседател беше Гордан Станковиќ, извршител од Скопје, во период од 11.06.2014 година до 07.09.2017 година претседател беше Зоран Петрески, извршител од Скопје, во период од 10.10.2017 година до 10.10.2020 година претседател беше Зоран Димов, извршител од Скопје, во период од 10.10.2020 година до 10.10.2023 година Претседател беше Ванчо Марковски, извршител од Тетово а сегашен Претседател на Комората е Весна Деловска, извршител од Скопје.

Комората на извршители на Република Македонија од 29 ноември 2007 година е рамноправна членка на Меѓународната унија на судски извршители, а воедно е и членка на Евродунавската група при оваа Унија.

Основни статутарни цели на Комората на извршители се унапредување, координирање и развивање на извршителската дејност во Република Македонија, заштита на самостојноста и независноста на извршителите, континуирано стручно оспособување на извршителите   и остварување на јавност и транспарентност на работата на Комората и вршењето на должноста на извршителите.

Комората се грижи за заштита на статусот и правата на извршителите и афирмација и развивање на угледот на Комората на извршители во општеството. Понатаму, афирмација на стручно и ефикасно извршување на судските пресуди и други извршни исправи со цел за остварување на правниот поредок, правото на приватна сопственост и крајна афирмација на правосудната власт како столб на државата.

Комората на извршители во својот делокруг на работа става голем акцент на грижата на уставноправниот статус и заштита на правата, слободите и достоинството на  странките и учесниците во извршувањето.

Врвна цел на Комората на извршители е севкупно унапредување на стандардите на извршувањето, примена на највисоките европски стандарди и добри практики во македонскиот систем на извршување.