Интервју Ванчо Марковски: Граѓаните најмногу должат за комуналии и за брзи кредити, а тие долгови тешко се наплатуваат
Но, во тој период додека не смеевте да повлекувате пари од сметките на граѓаните и фирмите и да запленувате имот примавте налози за присилна наплата и евидентиравте имот за заплена. Граѓаните велат дека по истекот на тој период биле практично нападнати од извршители. Што всушност се случи?
– Апсолутно не е точно дека извршителите по завршување на вонредната состојба ги нападнале граѓаните. Ние последни ја напуштивме вонредната состојба затоа што ни се дозволи да продолжиме со работа 30 дена по нејзиното завршување. Во тој период судовите работеа под посебни услови и со намален интензитет, нотарите исто така, банките со намален број на вработени, јавните институции исто така. Ваквата состојба нормално предизвика продукција на намален број на нови извршни исправи кои што извршителите ги примија во овој период. Јас лично во тој период, за четири месеци имав примено околу 100 барања за извршување, што е мала бројка. Овој период го искористивме поподробно да се навратиме на анализа на постарите предмети. Но, треба да се знае дека не само извршителите блокираат сметки. Таква надлежност имаат и единиците на локална самоуправа за наплата на данок на имот, фирмарини и слично, УЈП исто така има надлежност за блокада на сметки за наплата на даноци, Царинската управа за царинските прекршоци, Но, сепак во јавноста преовладува мислењето дека сите блокади на трансакциски сметки се резултат на нашата работа.